Mbaron mbledhja e Këshillit ministror të OSBE-së, Osmani: Kohë të vështira, duhet bashkëpunim

OSBE duhet të funksionojë sipas qëllimit të mandatit, ta ruajë sigurinë në terren, dhe ta shfrytëzojë dialogun si mjet për ndërtimin e vlerave, ka thënë ministri i jashtëm  Bujar Osmani, në fjalimin përmbyllës  të mbledhjes dyditore të këshillit ministror në Poloni.

Në cilësinë e kryesuesit të ardhshëm me Organizatën për Siguri dhe Bashkëpunim, Osmani ka theksuar nevojën për dialog dhe përforcim si dhe bashkimin e përpjekjeve për ndaljen e pushtimit rus në Ukrainë.

“Të gjithë duhet të fokusohemi në ndaljen e konfliktit,   rikthimin e paqes dhe krijimin e terrenit të qëndrueshëm për bashkëpunim. Prej nga vimë, jemi shumë të njohur me këto procese. Sidoqoftë dialogu vjen me besim. Më lejoni të jem i qartë. Agresioni rus mbi Ukrainën patjetër të ndalet. Maqedonia e Veriut është e gatshme që ta merr pjesën e saj të përgjegjësisë, duke e pasur privilegjin të jetë kryesuese e kësaj organizate. Në këtë rrugë sukseset dhe dështimet tona do të jenë edhe tuajat. Kohët e sotme të vështira kërkojnë vendosmëri dhe përkushtim. Prandaj, dëshiroj ta shfrytëzoj këtë rast për t'i bërë thirrje secilit prej jush të merr përgjegjësi” – u shpreh Ministri i Jashtëm i vendit, Bujar Osmani.

Mbajtjen e Këshillit të ardhshëm ministror të OSBE-së në Shkup, shefi i diplomacisë Osmani e ka vlerësuar  si një mundësi të mirë  për të biseduar mbi përpjekjet e përbashkëta mes vendeve anëtare, për një jetë më të sigurtë dhe hapat që duhen  ndërrmarë, gjithnjë nën parimet e Helsinkit. (Nermin Mulaki – Fejzullahu, TVM2)