Barrikadat në veri të Kosovës vështirësojnë jetën e qytetarëve

Barrikadat e vendosura në veri të Kosovës tash e njëmbëdhjetë ditë vazhdojnë të qëndrojnë duke vështirësuar jetën e qytetarëve në atë pjesë, ndërsa rrugët në drejtim të kufirit të Jarinjës dhe Bërnjakut janë të bllokuara.

Serbët lokalë kanë ngritur edhe një tjetër barrikadë në “Kroin e Vitakut”, përkatësisht nga Mitrovica në drejtim të Zveçanit, duke çuar kështu numrin e tyre të përgjithshëm në nëntë.

Dyqanet janë hapur, ndërkaq, edhe nëpër shkolla e fakultete mësimi ka filluar të mbahet.

Vërehet prezencë e shtuar e pjesëtarëve të KFOR-it në të dy drejtimet e kufijve me Serbinë.

Pjesëtarët e Policisë së Kosovës po vazhdojnë patrullimin e tyre nëpër zonat me popullatë të përzier në veri të Mitrovicës, duke ofruar rend dhe siguri për të gjithë qytetarët pa dallim.