Ukrainë, Zelensky vizitë ushtarëve në vijën e frontit

Presidenti ukrainas, Volodymyr Zelensky, ka bërë një vizitë të paparalajmëruar në qytetin e vijës së parë të frontit, Bakmut, ku forcat ukrainase dhe ruse kanë zhvilluar një betejë të ashpër disamujore. Ai ka takuar ushtarët dhe u ka ndarë çmime për mbrojtjen e qytetit në rajonin e Donjeçkut.

 

Për muaj të tërë, Bakmuti ka qenë një objektiv kyç për forcat ruse në rajonin e Donjeçkut dhe është dëmtuar jashtëzakonisht shumë. Megjithatë, forcat ukrainase kanë arritur të mos lejojnë depërtimin e forcave ruse.  Aktualisht në Bakmut kanë mbetur pak civilë, ndërsa qyteti kishte një popullsi prej 70.000 banorësh para luftës.

 

 

Ndërkohë presidenti rus Vlladimir Putin ka pranuar se operacioni ushtarak në Ukrainë nuk po realizohet sipas planit.

 

“Situata është tejet e vështirë në republikat popullore Donjeçk dhe Luhansk, Herson dhe Zaporozhje. Njerëzit, qytetarët e Rusisë varen nga ju dhe mbrojtja juaj. Obligim i juaj është të bëni gjithçka që është e nevojshme që të garantoni siguri të drejta dhe liri.”, - theksoi  presidenti i Rusisë, Vlladimir Putin.

 

Autoritetet në Ukrainë kanë frikë se pas vizitës së presidentit rus Vlladimir Putin në Minsk, do të tërheq edhe Bjellorusinë në luftë, prandaj kanë paralajmëruar rritjen e forcave të armatosura në kufi.