Protesta para ambasadës serbe në Tiranë, kërkohet heqja e barrikadave në veri të Kosovës

Me pankarta “Hiqni duart nga Kosova” një grup qytetarësh protestuan para ambasadës serbe në Tiranë, si reagim për vendosjen e barrikadave serbe në veri të Kosovës. Në protestën që zgjati disa minuta, protestuesit kërkuan që edhe institucionet shqiptare të mbajnë një qëndrim.

 

E njëjta kërkesë u përsërit edhe nga opozita shqiptare. Ish-ministri i Mbrojtjes, kreu i republikanëve Fatmir Mediu kërkoi, që nisur nga vendosja e 5.000 trupave serbe në kufirin me Kosovën, Shqipëria të mbledhë Këshillin e Sigurisë Kombëtare.

 

“Shqipëria nuk mund të mbajë këtë pozicion të papranueshëm në lidhje me situatën në Kosovë. Vendosja e mbi 5.000 trupave serbe me gjithë mjetet luftarake është qartësisht agresion ushtarak, e njëjta sjellje si e Rusisë me Ukrainën. Çfarë duhet të ndodhë tjetër që presidenti të mbledhë Këshillin e Sigurisë Kombëtare. Çfarë duhet të presë kryeministri që ta shtrojmë këtë çështje urgjentisht në NATO?”, shkruajti Mediu.

 

Edhe deputeti demokrat Kreshnik Çollaku shkroi se barrikadat janë një plan i Serbisë për të marrë veriun, ndaj Kosova dhe Shqipëria duhet të gjejnë unitet për këtë situatë kërcënuese.