Ndotja e ajrit, mjekët: Kujdes fëmijët, sidomos ata me sëmundje kronike

Niveli alarmant i grimcave PM në ajër, përveç spitaleve të fëmijëve, ka mbushur edhe ambulancat e mjekëve amë. Pothuajse çdo fëmijë ka kollitje  irrituese, thonë mjekët. Sipas tyre,  në këtë  periudhë, fëmijët me asmë, me sëmundje kronike si dhe ata me alergji janë ndër pacientët më të shpeshtë që kërkojnë ndihmë. 

 

“Ne vërtet duhet të jemi të kujdesshëm kur bëhet fjalë për këtë grup fëmijësh. Mushkëritë e tyre janë mjaft të gërryera dhe të dobësuara dhe nga kjo situatë ndikohet edhe shëndeti i tyre. Ajo që vihet re, pasqyra klinike e tyre është se kanë kollë të shpeshtë, shfaqja e temperaturës është vetëm nëse ka përzierje me ndonjë virus apo bakterie dhe ajo që mund të lërë përshtypje të madhe është kollitja  irrituese, e vazhdueshme që nuk ndalon për dy javë.”, - theksoi specialist pediatër, Angellco Andonovski.

 

Kur ajri është i ndotur, mjekët këshillojnë që  të evitohet qëndrimi në ambient të hapur. Rekomandojnë  edhe  konsumim të vitaminave dhe mineraleve  si dhe ushqehen shëndetshëm. Ndërkohë, për disa kategori, mbajtja e maskave është e domosdoshme.