Lufta në Ukrainë, 5 të vdekur dhe 13 të plagosur

Një valë tjetër sulmesh me dronët Shahed 136 të prodhuar nga Irani, kanë goditur disa qytete të Ukrainës. Shënjestër e sulmeve është infrastruktura civile dhe rrjeti energjetik, me çka pa rrymë kanë mbetur në mes të dimrit mbi 20.000 familje.

 

Nga këto sulme jetën e kanë humbur pesë civil dhe 13 të tjerë janë plagosur, njoftuan autoritetet e Ukrainës.

 

“Viktimat në mesin e popullatës civile si rezultat i agresionit të armatosur të Federatës Ruse në Rajonin e  Donetskut – një i vdekur, pesë të plagosur, rajoni i Zaporizhzhia – një i plagosur, rajoni i Kharkiv – dy të plagosur, rajoni Kherson – katër të vdekur, pesë të plagosur, sipas administratave ushtarake rajonale.”, - deklaroi Kyrylo Tymoshenko nga zyra presidenciale e Ukrainës.

 

 

Presidenti ukrainas thotë se vendi i tij po përgatitet për një ofensivë të përtërirë nga Rusia, e cila ai beson se do të “hedhë në erë gjithçka që u ka mbetur” në Ukrainë.

Ai tha se ofensiva do të ishte përpjekja e Moskës për të “ndërruar valën e luftës dhe të paktën të vonojë humbjen e saj”.

 

“Ne nuk kemi asnjë dyshim se Rusia do të hedhë të gjitha kartat që i ka lënë në tryezë dhe do të mbledhë gjithçka që mundet për të tentuar të kthejë valën e luftës dhe të paktën të vonojë humbjen e saj. Ne duhet të prishim këtë skenar rus. Ne po përgatitemi për këtë. Terroristët duhet të humbasin. Çdo përpjekje për ofensivën e tyre të re duhet të dështojë.”, - u shpreh presidenti i Ukrainës, Volodymyr Zelensky.

 

Inteligjenca ukrainase pretendon se Rusia mund të sulmojë njëkohësisht nga veriu ose lindja në muajt e ardhshëm. Sipas tyre,  Moska nuk ka plane t’i japë fund luftës madje  mund të jetë duke përgatitur një ofensivë të re e strategjia e saj është  të mbajë një korridor tokësor për në Krime dhe të pushtojë plotësisht rajonin lindor të Donetskut.