Kosovë, Isa Mustafa të enjten në interpelancë

Mbajtja e interpelancës për të enjten ka ardhur pas kërkesës së kryeministrit kosovar, Isa Mustafa, e cila është bërë e ditur në kryesi përmes shefit të grupit parlamentar të LDK-së, Ismet Beqirit.

 

Ndryshe, kërkesa për interpelancë e kryeministrit ishte kërkuar nga grupi parlamentar i AAK-së, të cilët kërkojnë nga kryeministri përgjegjësinë e ministrit, Aleksandër Jabllanoviq, për deklaratat e tij publike.

 

Jabllanoviq i kishte quajtur më 6 janar "egërsira" protestuesit në Gjakovë, të cilët po përpiqeshin të pengonin disa pelegrinë serbë që të vizitojnë Gjakovën me rastin e “Krishtlindjeve” ortodokse.

 

Opozita insiston që ministri Jabllanoviq të shkarkohet nga posti me gjithë kërkim-faljen e Jabllanoviqit për deklaratën e bërë. Opozita organizoi edhe protesta me kërkesën për shkarkimin e tij. 

 

Protesta e 27 janarit përfundoi me përplasje të rrepta ndërmjet forcave të rendit dhe protestuesve. Protesta e radhës mbahet të mërkurën, një ditë para seancës plenare në të cilën kryeministri Mustafa është thirrur në interpelancë.