Ushtria tajlandeze vret 5 kontrabandistë droge pranë “Trekëndëshit të Artë”, u gjen 500 mijë pilula metamfetamine

Ushtria tajlandeze ka vrarë pesë trafikantë të dyshuar droge dhe ka gjetur rreth 500,000 pilula metamfetamine pas një përleshjeje në veri të Tajlandës pranë rajonit famëkeq “Trekëndëshi i Artë”.

 

Një patrullë ushtarake hasi kontrabandistë të dyshuar që mbanin çanta shpine në orët e para të së enjtes në provincën Chiang Rai pranë Trekëndëshit të Artë, rajoni ku takohen kufijtë e xhunglës së Tajlandës, Laosit dhe Mianmarit dhe ka qenë prej kohësh një qendër fitimprurëse për tregtinë e paligjshme të drogës.

 

Duke refuzuar të kontrolloheshin, grupi prej pesë personash hapi zjarr dhe kjo pasoi me një përleshje të armatosur që zgjati rreth pesë minuta.

 

Pesë të dyshuarit u vranë dhe asnjë ushtar tajlandez nuk u plagos, ndërsa në posedim të grupit u gjetën afër gjysmë milioni pilula metamfetamine dhe një armë.

 

Përplasja e fundit pason dy incidente të ngjashme, vrasja e gjashtë kontrabandistëve të dyshuar të drogës në fillim të kësaj jave në provincën e afërt Chiang Mai dhe një përleshje në dhjetor që regjistroi 15 të vdekur.