Bie helikopteri mbi një çerdhe në Kiev, 18 viktima, mes tyre 3 fëmijë dhe 3 funksionarë

Të paktën 18 persona kanë humbur jetën, pas përplasjes së një helikopteri në periferi të Kievit të mërkurën. Helikopteri, u rrëzua pranë një çerdheje fëmijësh, e cila më pas është evakuuar. Në mesin e viktimave janë edhe tre fëmijë, 15 fëmijë të tjerë kanë marrë lëndime, bashkë me dhjetë të tjerë të rritur. Nëntë nga të vdekurit ishin në bordin e helikopterit, përfshirë ministrin e brendshëm të Ukrainës, Denys Monastyrsky, zëvendësministrin e brendshëm, Yevgeniy Yenin dhe sekretari i shtetit, Yurij Lubkovic.

 

“Dëgjuam një  zhurmë të madhe mbi shtëpi. Dhe pastaj 5 minuta më vonë, pati një shpërthim, një flakë e madhe. Helikopteri mori flakë.”, - tha një dëshmitare, Vira Sebalo.  

 

“Filluam të ndihmojmë, morëm  tre fëmijë, 6 dhe 7 vjeç.”, - u shpreh një dëshmitar, Andrii.

 

"U dhamë karamele, i qetësuam, i shkruam emrat, i pyetëm se çfarë u dhemb. Ata kishin vetëm gërvishtje dhe mavijosje. Gjetëm prindërit dhe kujdestarët e tyre dhe i dorëzuam.", - tha një dëshmitar tjetër, Hlib.

 

“Helikopteri ra mbi objektin më të vogël, se shumë pranë kishte një ndërtesë 10 katëshe. Mendoj se  piloti bëri një akt heroik dhe e drejtoi  helikopterin në ndërtesën më të vogël për sa më pak viktima.”, - u shpreh një tjetër dëshmitare, Teplova Raisa.

 

Parlamenti evropian solidarizohet me Ukrainën dhe familjet e viktimave.

 

“Mendimet tona janë me të gjithë njerëzit e guximshëm të Ukrainës, me familjet dhe njerëzit e dashur të ministrit Monastyrsky dhe zëvendësit të parë Yenin, me fëmijët dhe të gjithë ata që u vranë tragjikisht. Ne do të qëndrojmë pranë tyre.”, - deklaroi presidentja e Parlamentit Evropian, Roberta Metsola. 

 

Nuk dihet ende se çfarë e shkaktoi rrëzimin e helikopterit. Nuk kishte asnjë koment nga Rusia, trupat e së cilës pushtuan Ukrainën shkurtin e kaluar. As  zyrtarët ukrainas nuk iu referuan ndonjë sulmi rus në atë zonë në atë kohë.