Takimi Kovaçevski-Taravari, të martën, Kovaçevski: Do bisedojmë edhe zgjidhjet programore

Kreu i Qeverisë, Dimitar Kovaçevski, të martën pritet të takojë kreun e ASh-së, Arben Taravari, për të diskutuar mundësitë për bashkëqeverisje deri në zgjedhjet e radhës. Takimin e konfirmoi vetë kryeministri Kovaçevski.

  

“Nesër do të kemi takim me Taravarin, në të cilin sërish do të bisedojmë për avancimin nga takimi i fundit. Ndër të tjera do të bisedojmë edhe bashkëpunimin e mundshëm për zgjidhjet programore dhe ligjore të cilat mund ta avancojnë kapacitetin e shtetit, Kuvendit dhe miratimin e vendimeve që nënkuptojnë vazhdimin e rrugës europiane dhe realizmin e qëllimit tonë që deri në vitin 2030 të jemi vend anëtar i Unionit Europian.”, - deklaroi kryeministri, Dimitar Kovaçevski.

 

 

Nga Aleanca për Shqiptarët konfirmojnë se takimi do të mbahet në Qeveri, të martën në ora 13 dhe se fillimisht presin të shohin ofertën e mandatarit, përkatësisht kryeministrit Kovaçevski.

 

  

Të premten, ASh formoi ekipin, i cili do të negocojë hyrjen e mundshme në partisë në koalicionin qeverisës. Veç kreut të partisë, pjesë e ekipit negociues do të jenë edhe tre nënkryetarët e partisë dhe dy sekretarët.    

 

 

Hapi i ASh-së për të negocuar pjesëmarrjen në qeveri siç duket nuk i shkon në favor VMRO-DPMNE-së.

 

“Sigurisht nuk është sjellje europiane kur Taravari e lut VMRO-DPMNE-në që të votojë për të në Gostivar apo atëherë VMRO-DPMNE ishte e reformuar?! Kur Aleanca u nënshkrua për rrëzimin e qeverisë, Taravari u nënshkrua pro VMRO-së apo kundër BDI-së?! Ideja europiane nuk është të lusësh dhe të shantazhosh për funksione dhe punësimin e anëtarëve të partisë.”, - u shpreh zëdhënësi i VMRO-DPMNE-së, Naum Stoilkovski.

 

Me fillimin e negociatave për anëtarësim në Unionin Europian, kryeministri Dimitar Kovaçevski u ka bërë thirrje të gjitha partive politike që të përkrahin këtë proces me vepra konkrete. Sfida e parë është ndryshimi i kushtetutës që duhet të ndodhë deri në nëntor.