Pakistan, 37 të vdekur nga një shpërthim në një xhami

Të paktën 37 persona kanë humbur jetën në një shpërthim në një xhami në qytetin pakistanez Peshawar. Shpërthimi ndodhi kur xhamia ishte e mbushur me besimtarë dhe më shumë se 150 njerëz u plagosën. Një pjesë e ndërtesës u shkatërrua dhe zyrtarët thonë se njerëzit kanë mbetur nën rrënoja. Disa të tjerë po dërgohen në spitalet lokale. 

 

Shkaku i shpërthimit është i paqartë. Kryeministri Shebaz Sharif e ka dënuar ashpër sulmin. Në një deklaratë, Sharif tha se ata që qëndrojnë pas incidentit “nuk kanë asnjë lidhje me Islamin.”. Ai shtoi: “I gjithë kombi po qëndron i bashkuar kundër kërcënimit të terrorizmit.”.

 

Shpërthimi ndodhi gjatë lutjeve të pasdites në qytetin veriperëndimor, pranë kufirit të vendit me Afganistanin. Mohammad Asim, një zëdhënës i spitalit Lady Reading, tha se disa nga të plagosurit ishin në gjendje kritike. “Është një situatë emergjente.”, shtoi Asim.

 

Mediat lokale raportojnë se policia, ushtria dhe skuadrat e asgjësimit të bombave ndodhen në vendngjarje.