Tajvan, avioni rrëzohet në lum, 16 viktima

Avioni i “TransAsia”, me të cilin udhëtonin, preku një urë e u rrëzua në lumin Kelung, pranë kryeqyteti tajvanez. 28 pasagjerë arritën t’i mbijetojnë përplasjes. 

 

Mes 58 personave në bordin e avionit “ATR-72”, 31 ishin turistë. Një pjesë e mirë e tyre ishin turistë nga Kina. Ekipet e shpëtimit kanë sharruar trupin e avionit në përpjekje për të shpëtuar njerëzit e bllokuar brenda tij.

 

Filmime amatore të ngjarjes, të realizuar prej personave në automjetet që kalonin aty pranë, tregojnë se si avioni anohet fort, godet një taksi e pastaj urën përpara se të rrëzohej në lum.

 

E themeluar në 1951-shin si kompania e parë private e Tajvanit, që kryen fluturime të brendshme, “TransAsia” më vonë e zgjeroi veprimtarinë e saj edhe jashtë kufijve.

 

Korrikun e vitit të kaluar, një avion i kësaj linje ajrore u rrëzua në kushtet e një moti të stuhishëm në arkipelagun Penghu. Autoritetet tajvaneze pohuan më vonë se aksidenti kishte qenë pasojë e gabimeve të pilotit.