Shkurti, muaji i sëmundjeve të rralla, jeta nuk pret dot tenderët, pacientët duan ilaçe

Jeta nuk duron tenderë, sepse terapia për njerëzit me sëmundje të rralla, sado e kushtueshme të jetë, shpëton jetë. Kështu u tha në fillim të edicionit të 5-vjetorit të fushatës Nacionale “Të njohim sëmundjet e rralla”, gjatë së cilës u theksua se duhet të bëhet një listë pozitive e barnave që do të sigurohen për këta pacientë dhe prokurimi të bëhet përmes Fondit për Sigurim Shëndetësor.

 

“Këtë vit është rritur buxheti, por fatkeqësisht për disa sëmundje, për disa pacientë që ne si Klinikë Nefrologjike kemi aplikuar, nuk kanë hyrë në tender për këtë vit. Pra, këta pacientë duhet të presin një vit të tërë, që nëse vitin e ardhshëm ka buxhet më të madh të përfshihen, për të marrë ilaçe.”, - theksoi mjeku, Ivan Barbov.

 

“Maqedonia është një vend i varfër dhe ne e gjejmë veten mes buxhetit tonë të vogël dhe faktit që duam t'i ngjajmë Evropës, nuk e di, ndoshta ministria duhet të gjejë një mënyrë me ndonjë donacion ose fonde të tjera që do ta plotësonin këtë buxhet.”, - u shpreh mjekja, Nora Abazi Emini.

 

“Në të kaluarën kemi pasur probleme, por tani në Kroaci qëndrojmë mirë me prokurimin e barnave për personat me sëmundje të rralla dhe ai model është i ngjashëm me atë në Evropën Perëndimore. Ato barna nevojiten, sepse shumica e pacientëve që unë i trajtoj bëj një jetë normale.”, - deklaroi mjeku në Kroaci, Danko Millosheviq. 

 

Sipas mjekëve nuk ka mjaftueshëm barna për pacientët e regjistruar me sëmundje të rralla dhe numri i tyre është në rritje të vazhdueshme dhe ka barna të reja çmimet e të cilave janë shumë më të larta se ato që janë blerë deri më tani.