Opozita, kritika Kurtit për dialogun, Kurti: Këtë qëndrim, opozita t’ia thotë Eskobarit

Partitë politike opozitare në Kosovë kanë ngritur një varg kritikash në drejtim të kryeministrit, Albin Kurti lidhur me propozimin e BE-së për normalizim të marrëdhënieve mes Kosovës dhe Serbisë. Ata e kanë vënë theksin te ajo se propozimi tanimë i pranuar nga Kurti nuk përmban njohjen reciproke.

 

“Dua t’ia bëj të qartë kryeministrit se në raport me temën e dialogut nuk ka nevojë as të fshihet, as të mashtrojë, as të luaj rolin e shpëtimtarit e as të tradhtarit. Për PDK-në mjafton që ai ta ushtrojë përgjegjësinë konkrete ligjore dhe kushtetuese që e ka si kryeministër, të dialogojë dhe të arrijë marrëveshje që e respekton identitetin dhe sovranitetin shtetëror dhe kushtetues të RKS-së dhe krejt këtë ta bëjë në mënyrë transparente.”, - deklaroi kryetari i PDK-së, Memli Krasniqi.                                                                                            

 

“Në një takim të zhvilluar në zyrën e tij së bashku me liderët e partive tjera opozitare në Kuvend, kryeministri më kishte dorëzuar një dokument dyfaqësh i njohur më vonë si plani franko-gjerman për aq sa munda ta lexoj një shkrim telegrafik, propozimi i tillë nuk përmbante një marrëveshje finale e ligjërisht të obligueshme.”, - theksoi kryetari i LDK-së, Lumir Abdixhiku. 

         

Në reagimet e Krasniqit dhe Abdixhikut u kundërpërgjigj kryemisnitri Kurti.

 

“Kur e keni Eskobarin përpara, paramendojeni Albin Kurtin dhe thoni Kosova Republikë, marrëveshje finale, njohje reciproke në qendër asgjë më pak dhe krejt në fund të dashur deputet ky asociacion është asociacion i kryetarit të nderit të LDK-së dhe ish-kryetarit të PDK-së, kjo duhet me qenë preambula sa herë që ta merrni fjalën për Asociacionin.”, - u shpreh kryeministri i Kosovës, Albin Kurti.     

                                                     

Kryeministri Kurti, njëherit tha se propozimi i Bashkimit Evropian që njihet si plani franko-gjerman, nuk është marrëveshje finale, por është një kornizë apo një marrëveshje bazike, jo përfundimtare.