Përfundon debati për shkarkimin e Salit, nuk kishte kuorum për votim

Dhjetë minuta para mesnatës, Kuvendi përfundoi diskutimet rreth propozimit për shkarkimin e ministrit të Shëndetësisë Bekim Sali, pjesë e pikës së parë  të seancës së 104-të të propozimit për rikonstruksionin  e Qeverisë.

 

Megjithatë nënkryetari i Kuvendit Goran Misevski, tha se nuk do të ketë votim për shkarkimin e Salit , pasi Kuvendi nuk ka kushte për punë dhe e ndërpreu këtë pjesë të seancës për të cilën duhet të caktohet vazhdim shtesë.

 

Pasi deklaroi se lista e folësve për shkarkimin e Sali është shteruar, Misevski hapi diskutimin për propozimin për shkarkimin e Admirim Alitit nga pozita e ministrit për shoqëri informatike dhe administratë. Aliti nuk e shfrytëzoi mundësinë që të  prononcohet rreth propozimit për shkarkimin e tij.

 

Debati dje u vazhdua edhe pas orës 18 :00 gjë që shkaktoi reagimi e ashpër të VMRO DPMNE-së dhe akuza të ndërsjella me deputetët e maxhorancës se kush po e bllokon punën e Kuvendit. Aleanca për Shqiptarët kritikoi  sjelljen e opozitës  e VMRO pyeti deputetët e partnerit të ri të koalicionit qeverisës si do e justifikojnë  zgjedhjen kandidatit për ministër Krenar Logaj.

 

“Sipas definicionit, nëse një opozitë  është kritike e ashpër e qeverisë, ku është logjika të zvarritet dhe të mos lejohet shkarkimi i tyre. Një çështje tjetër është zgjedhja e ministrave, por mos lejimi i shkarkimit të ministrave ndodh vetëm në vendin tonë . Një opozitë solide duhet të jetë parimore dhe jo të bindë opinionin me oksimorone”, u shpreh Halil Snopçe nga Aleanca për Shqiptarët.

 

“Meqë po flasim  për oksimoronet, më lejoni t'ju pyes zoti Snopce, a do të votoni për një ministër që është këshilltar në Qeverinë e VMRO-DPMNE”, theksoi Nikolla Micevski nga VMRO DPMNE

 

Përveç Salit  dhe Alitit, duhet të shkarkohet edhe Xemail Çupi ministër pa resor përgjegjës për diasporën, gjithashtu kuadër i Alternativës , e cila  braktisi qeverinë e pakënaqur me ndarjen e re të resorëve pas marrëveshjes për zgjerimin e ekzekutivit me Aleancën për Shqiptarët.

 

Debati në Kuvend kai sur  që nga fillimi i javës, kur po diskutohet pika e parë ; propozimi për shkarkimin e ministrave . Në rend dite është edhe zgjedhja e katër ministrave dhe pesë zëvendësministrave të rinj.