Përshkallëzohet sërisht situata në Lindjen e Mesme

Vijojnë të mbeten të larta tensionet në Lindjen e Mesme. Disa raketa u hodhën para agimit nga Rripi i Gazës në drejtim të Izraelit, i cili u përgjigj menjëherë duke ngritur në ajër avionët luftarakë.

Ministria e Mbrojtjes në Izrael,  informon se gjatë sulmeve u goditën një vend prodhimi armësh, një kompleks ushtarak që i përket organizatës terroriste Hamas, një klinike mjekësore, një hotel, një stacion policie dhe një shkollë, në pjesën qendrore dhe veriore të Gazës si dhe një vend që i përket brigadave Al Qassam, krahut ushtarak të Hamasit, pranë kampit të refugjatëve Al Shati, në veri-perëndim të qytetit të Gazës.

Tensionet vijnë një ditë pasi  trupat izraelite vranë të paktën 11 palestinezë dhe plagosën  dhjetëra të tjerë gjatë një bastisjeje në Bregun Perëndimor . Shpërthime dhe të shtëna armësh u dëgjuan ndërsa trupat hynë në qytetin e vjetër të Nablus të mërkurën në mëngjes.

Edhe pse ushtria izraelite tha se vrau tre militantë të cilët refuzuan të dorëzoheshin , disa nga të vrarët janë  civilë, përfshirë dy të moshuar dhe një 16 vjeçar. Ministria palestineze të shëndetësisë ,  thotë se më shumë se 80 persona kanë marrë plagë nga plumbat. Pesë spitale të ndryshme në Nablus aktualisht po i trajtojnë ata.

Një zëdhënës i presidentit palestinez Mahmoud Abbas tha se ai e konsideronte qeverinë izraelite përgjegjëse për "këtë përshkallëzim të rrezikshëm, i cili po e shtyn rajonin drejt tensioneve shpërthyese".

Grupi militant Hamas, i cili kontrollon Rripin e Gazës, paralajmëroi se po "monitoronte krimet në përshkallëzim të kryera nga armiku kundër popullit palestinez në Bregun Perëndimor të pushtuar dhe se po i mbaron durimi".