Osmani, fjalim në sesionin e 11-të special të OKB-së

Në një moment lufta do të përfundojë. Infrastruktura do të rinovohet, shtëpitë do të rinovohen. Por, viktimat e këtij agresioni të pakuptimtë meritojnë më shumë: ata meritojnë drejtësi, ka deklaruar në Sesionin e 11-të Special Emergjent të Kuvendit të Përgjithshëm të OKB-së minsitri i jashtëm Bujar Osmani, duke folur për agresionin rus në Ukrainë.

 

“Përgjegjësia është mjet i domosdoshëm për të garantuar paqen, stabilitetin dhe sigurinë në mbarë botën, në mënyrë që të shpëtohen vërtet brezat e ardhshëm nga e keqja e luftës”, ka thënë më tej Osmani.

 

“Le të solidarizohemi, sepse nesër mund të jetë cilido nga vendet tona, por edhe të dënojmë, sepse është e papranueshme që një anëtar i përhershëm i Këshillit të Sigurisë së OKB-së të kryejë invazion ndaj një shteti tjetër sovran.Komuniteti ndërkombëtar, i mishëruar në Kombet e Bashkuara, nuk mund të lejojë një shkelje të rëndë të të gjitha normave dhe parimeve. Ajo që është në rrezik nuk është asgjë më pak se një vizion i botës në të cilën duam të jetojmë: ose do të sigurojmë bashkëjetesë dhe bashkëpunim paqësor midis kombeve, pa kërcënimet e luftës dhe agresionit ose do të detyrohemi të jetojmë në frikë të vazhdueshme, paqëndrueshmëri dhe pasiguri”, theksoi mes tjerash minsitri Osmani.