Alternativa: Ta formojmë asociacionin e komunave shqiptare

Alternativa ka ftuar partitë tjera shqiptare BDI, ASH dhe BESA, të ngrisin nismën për themelimin e Asociacionit të Komunave Shqiptare në RMV.

Sipas Alternativës, ky Asociacion do të kishte po ato kompetenca që bashkësia ndërkombëtare kërkon t’i ketë Asociacioni i Komunave me Shumicë Serbe në Kosovë.

 

“Në kohën që Kosova gjendet para marrëveshjes finale për normalizimin e marrëdhënieve me Serbinë dhe kur secili diplomat perëndimor që vjen në Prishtinë e përsërit refrenin “të bëhet Asociacioni i Komunave me Shumicë Serbe në Kosovë!”, pyetja që duhet të shtrohet është se pse partitë shqiptare në Maqedoninë e Veriut, ato që kanë komuna (BDI, ASH dhe BESA), nuk e ngrenë një iniciativë për themelimin e Asociacionit të Komunave Shqiptare në Maqedoninë e Veriut po me ato kompetenca që bashkësia ndërkombëtare kërkon t’i ketë Asociacioni i Komunave me Shumicë Serbe në Kosovë” – thuhet në komunikatën e Partisë Alternativa.

 

Derisa aleatët tanë perëndimor e kërkojnë një Asociacion të tillë nga Kosova, me pretendeime se kjo është në frymën perëndimore pse e njejta të mos ndodhë edhe në RMV- theksojnë nga Alternativa.“Ta bëjmë edhe ne në Maqedoninë e Veriut një Asociacion në këtë frymë perëndimore! Ja një kauzë që mund t’i bashkojë të gjitha partitë shqiptare, madje edhe Alternativën që nuk ka komunë. Ta fillojmë që sot nismën “Asociacioni i Komunave më Shumicë Shqiptare në Maqedoninë e Veriut!” Reciprocitet i bukur dhe, njëherazi, europian, apo?! Mbase kështu arrijmë edhe te tema e reciprocitetit gjuhësor mes shqipes në Maqedoninë e Veriut dhe serbishtes në Kosovë” – thuhet në komunikatën e Alternativës.