Seancë kushtuar barazisë gjinore: Nevojitet zbatim praktik i të drejtave gjinore

Shoqëria jonë akoma larg realizimit të plotë të barazisë gjinore, edhe përkundër përparimit të pjesëmarrjes së grave në tregun e punës, sipërmarje, politikë, arsim. Deputetet në seancën e parë kuvendore kushtuar avancimit të barazisë gjinore, konstatuan se pabarazi në më shumë sfera përfshirë edhe fushën e digjitalizimit.

 

“Boshllëqet gjinore duhet t’i kërkojmë në implementimin e këtyre zgjidhjeve ligjore, gjegjësisht në mbikëqyrjen e procesit të implementimit të tyre në praktik. Këtu mendoj se ne të gjithë ngecim dhe këtu na nevojitet përqendrim dhe fokus më serioz.”, - deklaroi deputetja e BDI-së, Rina Hajdari. 

 

Shqetësim u shfaq edhe në anashkalimin dhe heshtjen e dhunës ndaj gruas.

 

“Një veprim të shkëlqyer bëmë me femicidin, të cilin e përfshimë në kodin penal dhe e mira është se do të ketë zëvendësavokat të popullit, i cili do të merret me këtë problematikë, megjithatë shumë çështje ende mbeten të pazgjidhura, sikurse dhuna dhe ne do të duhet shumë të punojmë me ndihmën e mediave që kjo mos të tolerohet dhe heshtet.”, - theksoi kryetarja e Komisionit për mundësi të barabarta, Gordana Siljanovska Davkova.

 

Nuk mungoi optimizmi i pushtetit për aktivizimin e mekanizmave të reja për avancimin e barazisë gjinore.

 

“Po vijon përgatitja e draft versionit të ligjit për barazi gjinore, me qëllim jo vetëm harmonizim me standardet evropiane, por edhe përforcim të sistemit institucional për barazi gjinore. Bashkërisht do të punojmë për vendosjen e sekretariatit për barazi gjinore, i cili do të ndjek përfshirjen e perspektivës gjinore në të gjitha ligjet.”, - u shpreh ministrja e punës dhe politikës sociale, Jovanka Trençevska.

 

“Janë miratuar disa strategji nacionale dhe plane aksioni me të cilat bëhet përpjekje të mbulohen të gjitha sferat ku ndjehet pabarazia, diskriminimi, ekskluziviteti i burrave kundrejt grave dhe këto përpjekje vazhdojnë gjithsesi edhe me risitë dhe më e rëndësishme është buxhetimi i përgjegjshëm gjinor.”, - theksoi kryeparlamentari, Talat Xhaferi.

 

Ndryshimet në kodin zgjedhor në vitin 2015 përmirësuan zgjidhjen ligjore për pjesëmarrjen e të dy gjinive në listat e kandidatëve për deputetë. Kjo përbërje parlamentare përfaqësohet me 51 deputete.