Ndryshimet kushtetuese, Kovaçevski: VMRO-DPMNE me moral të dyfishtë

Qeveria dhe Kuvendi janë funksional, shumica parlamentare është rritur, ndërsa zgjedhje të parakohshme nuk do të ketë, thotë kryeministri Dimitar Kovaçevski. Por, a do të mund të sigurohet shumicë parlamentare për ndryshimet kushtetuese, të domosdoshme për vazhdimin e negociatave për anëtarësim në BE, Kovaçevski thotë se është detyrim i çdo deputeti të veprojë në drejtim të përcaktimit të vendit për anëtarësim në Union.

 

Akuzoi opozitën e kryesuar nga VMRO-DPMNE për moral të dyfishtë. Sipas tij, opozita fshihet pas popullit, ndërsa në ambasada premton miratimin e ndryshimeve kushtetuese nëse kthehen në pushtet.

 

“Ata shkojnë nëpër ambasada dhe thonë: “na jepni pushtet, pastaj në jepni pak kohë të ambientohemi dhe më pas do të ndryshojmë kushtetutën. Tani pyetja është se kë po gënjejnë?! A po i gënjejnë qytetarët se nuk do të votojnë për ndryshimet kushtetuese apo gënjejnë ambasadat e huaja se do të përkrahin ndryshimet kushtetuese?! Le të dalin ta thonë këtë. Lidership është të marrësh vendime për të ardhmen e gjeneratës së tashme dhe të ardhshme dhe jo të fshiheni pas popullit. E vetmja që po bën VMRO-DPMNE është se ajo po fshihet pas popullit. Tjetër gjë flet në ambasada dhe tjetër gjë para popullit.”, - deklaroi kryeministri, Dimitar Kovaçevski.

 

 

Mirëpo, VMRO-DPMNE konsideron se veç saj edhe një pjesë e madhe e deputetëve të LSDM-së nuk do të përkrahin ndryshimet kushtetuese.

 

“Është e qartë se Kovaçevski jo vetëm që s’ka shumicë për ndryshimet kushtetuese, por një pjesë e madhe e deputetëve të LSDM-së nuk do të përkrahin ndryshimet kushtetuese, prandaj Kovaçevski ka frikë dhe po shpërndan mjegull.”, -thuhet në reagimin e VMRO-DPMNE-së. 

 

Partia e Mickovskit fton Kovaçevskin, që të zbulojë ambasadorët që thonë se VMRO-DPMNE është e gatshme të miratojë ndryshimet kushtetuese nëse kthehet në pushtet. 

 

“VMRO-DPMNE nuk do të merr pjesë në grupin punues për ndryshimet kushtetuese, pasi nuk i japim kredibilitet një procesi jokredibil.”- thuhet në reagimin e VMRO-DPMNE-së.