MPJ-a bullgare: Po i ndjekim me shqetësim zhvillimet në RMV

Nënkryetarja e Bullgarisë, Iliana Jotova, ka deklaruar se nuk ka asnjë shenjë se Qeveria në Maqedoninë e Veriut dëshiron t'i japë fund gjuhës së urrejtjes ndaj çdo gjëje bullgare. Siç raporton “Bg on Air”, Jotova ka theksuar se “autoritetet në Shkup nuk duan të marrin vendime konkrete në lidhje me të ashtuquajturat “vepra penale”.

 

“Komisioni i përbashkët historik nuk funksionon, nuk ka ndryshim në tekstet shkollore për të cilat ka insistuar pala bullgare, as për pjesën tjetër të pretendimeve të Bullgarisë, të cilat janë të shkruara bardhë e zi në protokollin e përbashkët. Të gjitha ngjarjet pas këtij propozimi, nga djegia e klubit në Manastir e deri te cenimi i institucionit kulturor bullgar, ky është institucion zyrtar i shtetit bullgar dhe në baza reciproke, autoritetet maqedonase i kanë lënë të gjitha këto veprime pa ndëshkim, të gjithë të dyshuarit janë të lirë.”, - deklaroi nënkryetarja e Bullgarisë, Iliana Jotova. 

 

Ndërkohë nga ministria e Punëve të Jashtme bullgare thonë se po ndjekin me shqetësim të shtuar zhvillimet në Maqedoninë e Veriut lidhur me përpjekjet për të kufizuar të drejtën e shoqërimit të bullgarëve në vend. 

 

 

Deklarata e MPJ-së bullgare vjen pasi ministria e drejtësisë i ndaloi përdorimin e emrit “Ivan Mihailov” klubit bullgar nga Manastiri, i cili më vonë njoftoi se do të apelojë në Strasburg.