Kuvend, Ligji për Vendim Pune me procedurë të shkurtër

Sipas zëvendësministrit të Financave, Adrian Xheladinit, ligji do të zgjidhë problemet e shumë qytetarëve që nuk i kanë të rregulluara marrëdhëniet e punës. 

“Me këtë ligj rregullohet statusi i mijëra personave të cilët janë të angazhuar në bazë të marrëveshjeve për vollunterë, kontratave në vepër, marrëveshjeve autoriale, ose ndonjë lloj tjetër të marrëveshjes në organet shtetërore, institucionet nga sfera e kulturës, arsimit, shëndetësisë, mbrojtjes sociale dhe mbrojtjes së fëmijëve të themeluara nga RM-ja dhe njësive të Vetëqeverisjes Lokale, si dhe ndërmarrjet publike, entet fondet të themeluara nga RM-së”- deklaroi zëvendësministri i Financave, Adrian Xheladini.

Kuvendi me procedurë të shkurtuar do të miratojë edhe Ligjin për Akademi të Gjykatësve, Ligjin për Ndryshimin dhe Plotësimin e Këshillit Gjyqësor, ndryshimet dhe plotësimet e Ligjin për Arsim të Lartë, si dhe plotësimet dhe ndryshimet në Ligjin për Pagesën e Kontributeve.

Ndryshimet në Ligjin për Kontributet do të përmbushin një kërkesë më të madhe të palëve që u dedikohet, tha deputeti i VMRO-DPMNE-së, Ilija Dimovski.

“Këto ligje kuvendi i miratoi gjatë sezonit të verës, kur për fat të keq nuk u zhvillua asnjë debat më i thellë nga palët që u dedikohet ligji. Ne si grup parlamentar i analizuam të gjitha vërejtjet për ligjin dhe  zhvilluam konsulta më të thella me më shumë institucione shtetërore që kanë të bëjnë me këtë  dhe vlerësojmë se këto propozim-ndryshime janë në drejtim të përmbushjes së një konsensusi më të madh shoqëror rreth rregullimit të kësaj fushe”- tha deputeti i VMRO-DPMNE-së, Ilija Dimovski.

Kuvendi ka angazhuar komisionet amë që të debatojnë për ligjet në fjalë, ndërsa të njëjtat do të kthehen në seancë plenare për miratim. (Naim Ramadani, TVM2)