Kumanovë: “Shporta e Ramazanit”, FRI dhe “Vllaznia”, ndan pako me ndihma

Për nder të muajit të shenjtë të Ramazanit dhe me qëllim për t’u dalë në ndihmë sadopak qytetarëve të rrezikuar nga gjendja e vështirë ekonomiko-sociale, Forumi Rinor Islam në bashkëpunim me Shoqatën Edukative “Vllaznia”, realizuan pjesën e parë të mbushjes dhe shpërndarjes së 100 shportave me gjëra ushqimore e higjienike, në vlerë prej 1.500 denarëve nga donacionet e mbledhura gjatë këtyre ditëve në pikat e grumbullimit në qytetin e Kumanovës.

 

“Jemi këtu për ta bërë mbushjen e parë të pakove të Ramazanit apo e njohur si “Shporta e Ramazanit”, kemi mbushur 100 shporta të cilat përmbajnë produktet elementare për nevojat e familjeve skamnore.”, tha mes tjerash, Zeqir Esati nga FRI, dega Kumanovë.

 

Nga Forumi Rinor Islam, apelojnë deri tek të gjithë qytetarët që të ndajnë nga buxheti i tyre me qëllim që familjeve në nevojë t’ua lehtësojnë këto ditë të vështira ekonomike e sociale.

 

“Apelojmë që të na mbështesin edhe më shumë në këtë aktivitet, që t’u dalim në ndihmë familjeve në nevojë e skamnore.”, tha mes tjerash, Zeqir Esati.

 

Ndryshe, Forumi Rinor Islam, përpos aktiviteteve humanitare edhe këtë ramazan rajonit tonë do t’i sjellë edhe programe të larmishme kulturore e artistike, si dhe do të organizohen iftare publike në sheshin e Kumanovës dhe në Likovë.