Osmani në Baku: Njerëzit e këtij rajoni s’duan konflikt

Organizata për Siguri dhe Bashkëpunim në Evropë mbështet një zgjidhje paqësore, gjithëpërfshirëse dhe të qëndrueshme të mosmarrëveshjeve midis Azerbajxhanit dhe Armenisë, ka thënë kryesuesi i OSBE-së Bujar Osmani, në vizitën e tij në Baku. Në takim me homologun e tij, Xhejhun Bajramov, Osmani ka ndarë përvojat e RMV-së në zgjidhjen e mosmarrëveshjeve me fqinjët, duke inkurajuar  Armeninë dhe Azarbejxhanin të gjejnë mekanizma lehtësues për dialog si dhe të ndërtojnë besimin që çon drejt normalizimin e marrëdhënieve.

 

“Qëndrojmë prapa çdo përpjekjeje që ofron dinamikë pozitive për zbatimin e plotë të masave të dakorduara më parë dhe identifikimin e fushave  të reja për marrëveshje. Gjithashtu inkurajoj angazhimin e vazhdueshëm  dypalësh ndërmjet Azerbejxhanit dhe Armenisë drejt paqes dhe zgjidhjes së çështjeve kryesore, si demarkacioni dhe hapja e linjave të komunikimit.”, - deklaroi ministri i jashtëm, Bujar Osmani.

 

 

Shteti i Azerbajxhanit promovon dhe dëshiron paqe që buron nga bashkëpunimi dhe dialogu, ka thënë ministri, Bajramov, i cili është mirënjohës për bashkëpunimin dhe rolin e OSBE-së në këtë rajon.

 

“Jemi shumë mirënjohës për rolin e OSBE-së. E dimë rëndësinë dhe bashkëpunimin me OSBE-në. Duam që të respektohet edhe bashkëpunimi me OSBE-në. Duam të respektohet integriteti territorial i shtetit tonë. Azerbajxhani është shtet që do paqe dhe kontribuon për paqen në botë. Duam dhe mbështesim dialog me parime.”, - theksoi ministri i jashtëm i Azerbajxhanit, Xhejhun Bajramov.

 

Në takim është diskutuar edhe siguria globale dhe realiteti me agresionin rus, që sipas Osmanit kjo situatë paraqet kërcënim serioz për vlerat dhe parimet e OSBE-së.