Mexhiti: Anesteziologut mund t’i merret licenca përgjithmonë

Anesteziologut Valon Dervishi mund t’i merret licenca përgjithmonë dhe asnjëherë mos të punon si mjek, thotë ministri i shëndetësisë, Fatmir Mexhiti.  Tani për momentin, anesteziologut licenca i është marrë për 7 vjet dhe ai për momentin është në paraburgim. 

 

“Në kuadër të ligjit, atij do t'i merret licenca për 7 vjet deri në përfundimin e procedurës. Më pas atij mund t'i hiqet licenca përjetë. Nuk ka asnjë procedurë disiplinore të nisur deri tani, nuk e di pse, por ajo çfarë mund t’ju them, deri para dy javësh, imagjinoni nuk ka pasur një komision disiplinor në spital, nuk e di pse ishte kështu. Tani e tutje tek unë në Ministrinë e Shëndetësisë nuk do të vazhdojë kështu, gjërat do të trajtohen në të njëjtin moment dhe do të ndëshkohen më rëndë.”, - deklaroi ministri i shëndetësisë, Fatmir Mexhiti.

 

Me propozim të Prokurorisë nga ana e gjyqtarit të procedurës paraprake nga Gjykata Themelore e Tetovës, për mjekun Valon Dervishin 43-vjeçar, anesteziologut nga Tetova i është caktuar masë paraburgimi prej tetë ditësh, i cili ka incizuar dhe transmetuar drejtpërdrejt në rrjetet sociale  personelin mjekësor dhe gratë shtatëzana, paciente në njërën nga sallat e spitalit dhe ka publikuar ato drejtpërdrejtë në rrjetin social TikTok. Përcaktimi i masës vjen pasi Prokuroria Themelore Publike Tetovë ka iniciuar procedurë ndaj të akuzuarit për veprat penale “punë nga pakujdesia në shërbim” si dhe “incizim i paautorizuar” nga neni 152 paragrafi 2 i Kodit Penal.