Në Kamjan të Bogovinës u lëshua në përdorim fabrika “Multipark Izairi”

Është lëshuar në përdorim fabrika “Multipark Izairi” në fshatin Kamjan, komuna e Bogovinës. Fabrika do të merret me prodhimin e kabllove dhe tubave të bakrit, e vetmja në Pollog, por edhe në vend, që do të merret me këtë prodhim. Nebi Izairi, njëri ndër pronarët e fabrikës tha se kjo ka qenë ëndërr e familjes për të investuar në vendlindje.

 

“Jemi krenar që  mundin tonë ta kurorëzojmë me këtë investim të madh, kjo ishte ëndërr  e kamotshme. Guri peshon ne vendin e vet. Realizimi ka kërkuar mund dhe përkushtim të madh.”, - deklaroi pronari i “Multipark Izairi”, Nebi Izairi.

 

Zëvendëskryeministri për Çështje Ekonomike, Fatmir Bytiqi dhe ministri i Ekonomisë, Kreshnik Bekteshi, thanë se qeveria ka përkrahur nga themelimi këtë biznes duke i ndihmuar në mjete të pakthyeshme. Ata njëherit ftuan mërgimtarët të investojnë në vendlindje, duke premtuar edhe përkrahje të Qeverisë.

 

“41% përkrahet nga shteti, një ndër përkrahjet më të mëdha që ka dhënë kjo Qeveri. Qeveria ka marrë masa për zhvillim të barabartë regjional. Rajoni i Pollogut merr më shumë përkrahje se sa rajoni i Shkupit.”, - theksoi zëvendëskryeministri për Çështje Ekonomike, Fatmir Bytyqi. 

 

“Edhe Bogovina si komunë ka hapësirë që të ketë zhvillim ekonomik. Nga çdo mërgimtar, 5 vite do të mbështetet me 15 % shtesë që i takon. Çdo investim që ndodhë nga një mërgimtar do mbështetet deri në 1 milion euro nga qeveria me mjete të pa kthyeshme.”, - u shpreh ministri i Ekonomisë, Kreshnik Bekteshi.

 

Investitorët paralajmëruan që deri në fund të vitit 2026 investimi do të arrijë në 26 milion euro dhe pritet të hapen shumë vende të reja të punës.