Kosova, situata ne veri të kosovës e ’’qetë’’

Ndërtesat komunale në Zveçan, Zubin Potok dhe Leposaviç mbeten nën siguri të fortë policore të Policisë së Kosovës pas trazirave në të cilat pati të lënduar dje. Gatishmëria luftarake e ushtrisë serbe është ende në nivelin më të lartë u tha në mbledhjen e Këshillit të Sigurisë Kombëtare të Serbisë.

“Presidenti i Republikës tha dhe paralajmëroi ditët e fundit se Kurti nuk do të ndalet dhe do të vazhdojë me aktivitetet që synojnë rrezikimin e mëtejmë të komunitetit serb. Serbia është plotësisht e përkushtuar për vazhdimin e dialogut. Ne nuk duam përshkallëzim të konfliktit, nuk duam luftëra, nuk bëjmë lojëra luftarake”, u shpreh ministri i Mbrojtjes i Serbisë, Milosh Vuçeviç.

 

Kryeministri i Kosovës  Kurti u bëri thirrje të gjithë qytetarëve, veçanërisht serbëve, që të bashkëpunojnë me kryetarët e rinj dhe kabinetet e tyre, të cilat sipas tij do të jenë multietnike dhe shumëgjuhëshe.

 

“Si kryeministër i të gjithë qytetarëve, ftoj të gjithë, veçanërisht qytetarët serbë të Kosovës, që të bashkëpunojnë me kryetarët e rinj dhe kabinetet e tyre, të cilat do të jenë multi-etnike, multi-kulturore, multi-gjuhësore dhe multi-partiake. Ata janë të zgjedhur dhe nuk janë kundër askujt, por në shërbim të të gjithëve. Dëshiroj të falenderoj pjesëtarët e Policisë së Republikës së Kosovës për qëndrimin e tyre profesional, shtetëror dhe në mbrojtje të sundimit të ligjit”, ka shkruar kryeministri i Kosovës Kurti në Facebook.

 

Komuniteti ndërkombëtar dënoi incidentet e fundit. NATO kërkon nga Prishtina një deeskalim të menjëhershëm të situatës. Sipas SHBA-së, trazirat po dëmtojnë më tej marrëdhëniet Beograd-Prishtinë. BE paralajmëroi se çdo veprim shtesë i njëanshëm ose provokues është i papranueshëm.

 

Tensionet në komunat me shumicë serbe të Kosovës erdhën pasi kryetarët e sapozgjedhur të komunave në zgjedhjet e bojkotuara nga serbët morën detyrën dhe hynë në ndërtesat komunale.

 

Janë dëmtuar disa automjete zyrtare të policisë, ekipeve të shtypit dhe EULEX-it. Të shtëna janë raportuar edhe në disa lokacione, për këtë arsye është hapur një hetim.