Ukrainë, Biden dhe Sunak ritheksojnë mbështetjen

 

“Terroristët rusë po përpiqen të përkeqësojnë më tej situatën që krijuan me ekocidin e tyre. Vazhdojnë të bombardojnë Khersonin dhe bashkësitë  rajonale që u përmbytën nga terroristët. Ata po bombardojnë edhe pikat e evakuimit, gjë që tregon ligësinë  që  asnjë terrorist tjetër në botë nuk e ka përveç atij rus.”, - deklaroi presidenti ukrainas, Volodymyr Zelensky.

 

“Nuk duhet të harrojmë se përmbytja e papritur katastrofike u shkaktua nga sabotimi i palës ukrainase.”, - theksoi zëdhënësi i Kremlinit, Dmitry Peskov.

 

Presidenti amerikan Biden thotë se Perëndimi ka bërë gjithçka për të përgatitur Ukrainën. Pas takimit me kryeministrin britanik, Sunak, ata përsëritën angazhimin e tyre për të ndihmuar Kievin të zmbrapsë pushtimin e vazhdueshëm rus.

 

“Unë besoj se kemi financat e nevojshme për të mbështetur Ukrainën për aq kohë sa është e nevojshme. Dhe besoj se do t'i ndihmojmë, edhe pse në Capitol Hill diskutohet nëse dhe deri kur duhet ta bëjmë atë. I pyes njerëzit të imagjinojnë se çfarë do të ndodhë nëse ne nuk e mbështesim Ukrainën.”, - u shpreh presidenti i ShBA-ve, Joe Biden.

 

“Për herë të parë në gjysmë shekulli, ne po përballemi me luftë në kontinentin evropian. Siç e kam thënë më parë, ShBA-të dhe Mbretëria e Bashkuar janë bërë  bashkë  për të mbështetur Ukrainën dhe vlerat e demokracisë dhe lirisë.”, - deklaroi kryeministri i Mbretërisë së Bashkuar, Rishi Sunak.

 

Rrënimin e digës e kanë  dënuar edhe përfaqësuesit e Bashkimit Evropian. 

 

“Diga nuk është bombarduar, është shkatërruar nga eksplozivi i vendosur në hapësirat  ku janë vendosur turbinat. Kjo pjesë është nën kontrollin rus, pjesa ku ndodhën shpërthimet. Unë nuk isha atje për të parë se kush e bëri atë, por indikacionet tregojnë se nuk mund të jetë dikush tjetër nëse është nën kontrollin rus.”, - theksoi shefi i Diplomacisë  Evropiane, Josep  Borrel. 

 

Luftimet vazhdojnë në front. Luftëra të ashpra në Zaporozhye dhe Donetsk. Kundërofensiva e shumëpritur e Ukrainës për të rimarrë nën kontroll territoret e vendit të pushtuara nga Rusia ka filluar, ku  fokusi i kundërofensivës së shumëpritur ukrainase do të jetë në Zaporizhja.