Ndryshimet kushtetuese, Pendarovski: VMRO mund të votojë edhe si opozitë

 

“Konkluzat e Këshillit Evropian janë të qarta si kristal. Patjetër t’i bëni ndryshimet kushtetuese deri në fund të procesit të skriningut që me automatizëm të vazhdoni  me konferencën e dytë dhe hapjen e  klasterëve. Në  ato konkluza të Këshillit të BE-së është ndërtuar edhe qëndrimi i Bullgarisë, i të gjithë anëtarëve. Duhet të kemi konkluza të reja, ndërsa ju e dini sa e vështirë është të arrihet në konsensus të plotë.”, - deklaroi kryetari i shtetit, Stevo Pendarovski. 

 

 

Komentet Pendarovski i tha në press konferencën me presidenten e Sllovenisë, Natasha Pirc Musar. Kjo e fundit pohon realitetet se të gjitha vendet aspirantë duhet t’i plotësojnë disa kushte në këmbim të anëtarësimit në BE.

 

“Më besoni se si njeri që e di peshën e afrimit të ligjshmërisë  me BE-në, e di se është e vështirë. Sllovenia e kaloi atë proces. Më lejoni të potencoj se edhe  Sllovenisë iu desh ta ndryshojë Kushtetutën dhe atëherë në atdheun tim  dëgjohej se si ajo nuk ishte e mirë për popullin slloven, si do të humbej gjuha sllovene. Por, ishim të vetëdijshëm dhe politika sllovene e dinte se duhej të ishte e bashkuar kur duhej të realizoheshin projektet evropiane. Shpresoj se politikanët do ta kuptojnë rëndësinë e unitetit se duhet të shkohet 5, 6 hapa përpara dhe ta kuptojnë çka është e mirë për Maqedoninë. Sinqerisht dëshiroj të keni mençuri politike të mjaftueshme dhe do ta ndryshoni Kushtetutën. Edhe BE-ja duhet ta bëjë pjesën e vet.”, - theksoi kryetarja e Sllovenisë, Natasha Pirc Musar. 

 

Dy kryetarët e shteteve kanë biseduar edhe  për  bashkëpunimin mes dy vendeve, sfidat rajonale dhe problemet kontinentale aktuale.