Çmimet e derivateve të naftës, shitësit: nuk presim të ndikojnë te produktet

Parashikimet e tilla dalin nga vetë shitësit e produkteve ushqimore.

 

Skeptik për një rritje çmimesh shprehen edhe drejtorët e kompanive të taksive. Ata as që mendojnë të rrisin çmimet e shërbimeve të tyre në çdo dy javë, kur dhe rriten çmimet e karburanteve.

 

Kjo do të dëmtonte vetë kompanitë, por edhe qytetarët.

 

“Çdo ndryshim i çmimit për çdo taksi-veturë kushton 50 euro, d.m.th. fiskalizimi i taksimetrit, dhe për atë arsye nuk mundemi të bëjmë aso ndryshime shumë të shpeshta. Nëse sot e kemi një çmim tjetër e mbas dy jave e kemi një çmim tjetër, atëherë me siguri se do të krijohet huti tek qytetarët dhe do të pasojë humbja e punës”- deklaroi drejtori i Kompanisë së Taksive “Eurokom”, Muzafer Rexhepi.

 

Ekspertët ekonomikë dalin me analizat e tyre. Sipas ekspertit ekonomik, Sami Bislimit, rritje të theksuar të çmimeve të produkteve nuk mund të ketë, pasi që fondet blerëse të qytetarëve janë të pakta.

 

“Çmimet e naftës ndikojnë në drejtim të rritjes së çmimeve. Zvogëlimi i fondeve blerëse ndikon në drejtim të uljes së çmimeve, sepse nuk ka presion në drejtim të rritjes së kërkesës të produkteve në tregun e vendit. Mendimi im përfundimtar është se nuk do të ketë ngritje të çmimeve, posaçërisht jo ngritje të theksuar të produkteve në tregun e brendshëm”- tha eksperti i ekonomisë, Sami Bislimi.

 

Disponimi për ruajtjen e çmimeve aktuale vërehet edhe në tregje. Shitësit dhe qytetarët ankohen për një situatë të rënduar financiare.

 

“Çmimet janë të ulëta, fitimi është i vogël, populli para nuk ka, aty është problemi”- u shpreh një shitës.

 

“Çmimet, jeni duke e parë edhe vetë. Krizë e madhe, problem është”- theksoi një qytetar.

 

“Çmimet nuk janë fort të shtrenjta, por edhe shtrenjtë janë kur nuk ka para”- tha një qytetar.

 

Dje, Komisioni Rregullator i Energjetikës rriti çmimet e derivateve të naftës. Benzina u shtrenjtua për tre denarë për litër, ndërsa dizeli për katër.