Eurointegrimet, PE jep rekomandimin e 9-të për Maqedoninë

Ky është mesazhi kryesor në draft-rezolutën e raportuesit, Ivo Vajgl, e cila do të miratohet në seancën plenare pas një muaji, ndërsa sot kaloi në Komitetin për Punë të Jashtme të PE-së.

 

Nënkryetari Komitetit të Punëve të Jashtme të Parlamentit Evropian, Andrei Plenkoviq, theksoi se është e padrejtë ajo që BE-ja i bën Maqedonisë me bllokadën greke. Sipas tij, kriza aktuale politike në vend është gjithashtu rezultat i frustrimit nga bllokada e padrejtë në  strukturat euroatlantike.

 

“Të dëgjohet qëndrimi i KE-së, e cila viteve të fundit disa herë  qartë tha se bisedimet mund të fillojnë dhe paralelisht mund të zhvillohen bisedimet diplomatike për çështjen që është në rend dite, ku të gjithë e dimë se është çështja e emrit”- deklaroi nënkryetari i Komitetit për Punë të Jashtme në PE, Andrej Plenkoviq.

 

Në moment të fundit në rezolutën e PE-së u gjetën edhe afera “PUÇ”, “Përgjimi” dhe në përgjithësi kriza e fundit politike.

 

PE-ja shpreh shqetësim për klimën politike në vend dhe kërkon nga qeveria që të respektojë rolin e parlamentit, të sigurojë volum të mjaftueshëm dhe kohë për konsultim, mbi të gjitha për amendamentet kushtetuese dhe të lejojë një kontroll të plotë, të pavarur parlamentar.

 

Raporti i Parlamentit Evropian potencon edhe lirinë e mediave, dyshimet për gjyqësi selektive, problem në trajtimin e etniteteve pakicë dhe çështje të tjera sociale.

 

Por, eurodeputetët  besojnë se emri nuk duhet të pengojë hapjen e negociatave, por duhet të zgjidhet para përfundimit të negociatave dhe hyrjes së Maqedonisë në BE.