Cikloni në Brazil, shkon në 13 numri i viktimave

Të paktën 13 persona kanë vdekur dhe tre të tjerë janë zhdukur pas një cikloni që ka përfshirë shtetin e Rio Grande do Sul në Brazilin jugor.

Mediat e huaja shkruajnë se shirat e dendur dhe erërat e forta shkaktuan dëme në dhjetëra zona të këtij shteti, përfshirë kryeqytetin e tij, Porto Alegre.

Nga ana tjetër, numri i personave të zhdukur u reduktua, nga 20 që ishin shpallur të shtunën në tre. Të gjithë ata janë banorë të qytetit bregdetar të Caraa, që ndodhet 90 kilometra nga Porto Alegre.

Erërat e forta goditën brigjet e shtetit , kryesisht në qytetin Tramandai, ku sipas shifrave zyrtare u regjistruan erëra deri në 101 kilometra në orë.

Shtëpitë e rreth 5,000 banorëve u dëmtuan dhe dje rreth 84,000 njerëz ende nuk kishin energji elektrike dhe rreth 800 u desh të evakuoheshin me helikopter.