Ushtria ukrainase pretendon përparime në fushëbetejë

 

Shtabi i Përgjithshëm i ushtrisë ukrainase tha se “përpjekjet kryesore” të Rusisë po përqendrohen përreth Limanit, Bakhmutit dhe Marijinkës, ku “luftimet e ashpra po vazhdojnë”. Ushtria ukrainase tha se forcat e saj “kanë pasur sukses dhe po bëhen më të forta në dëbimin e rusëve nga pozicionet që më herët ata kishin marrë nën kontroll”. Në raportin e Shtabit u tha po ashtu se rusët po vazhdojnë të rezistojnë.

 

Anatoly Kurtev, sekretar në këshillin e qytetit të Zaporizhjës, ku ndodhet centrali më i madh bërthamor në Evropë, tha se ushtria ka thënë se asnjë civilë nuk është plagosur dhe nuk janë shkaktuar dëme të mëdha në sulmet e kryera gjatë natës nga Rusia. Kievi së fundi e ka akuzuar Rusinë se po planifikon një sulm “terrorist” në central, të cilin Moska e ka marrë nën kontroll që në ditët e para të nisjes së pushtimit. Ambasadori rus në Kombet e Bashkuara, Vasily Nevenziya, tha se ai i ka shkruar Këshillit të Sigurimit dhe sekretarit të përgjithshëm, Antonio Guterres, për t’i siguruar se “nuk kanë synim që të sulmojmë centralin bërthamor”.