Policia bullgare arreston 15 kontrabandistë emigrantësh

Policia bullgare ndaloi rreth 300 migrantë të parregullt dhe arrestoi 15 kontrabandistë gjatë një operacioni 48-orësh mbarëkombëtar, thanë zyrtarët.

 

Kjo vjen pasi Bullgaria synon të pranohet në zonën Schengen të Evropës, pa pasaporta, deri në vitin 2024.

 

Në kryeqytetin Sofje dhe në qytete të tjera, u kryen kontrolle në dhjetëra adresa në të gjithë vendin e Evropës Lindore.

 

Rreth 40 emigrantë, përfshirë fëmijë, u zbuluan të enjten në një kamion cisternë pranë fshatit Chepintsi, jo shumë larg Sofjes. Automjeti ishte modifikuar për të transportuar njerëz.

 

”Kontrabandistët ishin jashtëzakonisht të aftë në fshehjen e emigrantëve në mjetet e tyre të transportit”, tha Petar Todorov, sekretar i përgjithshëm i MPB-së.

 

Bullgaria, së bashku me Rumaninë fqinje, e presin me padurim bashkimin me zonën Schengen, e cila përbëhet nga 27 vende që kanë pezulluar kryesisht kontrollet kufitare midis anëtarëve.

 

Aderimi i Rumanisë dhe Bullgarisë u pengua nga Austria në dhjetor për shkak të shqetësimeve se ato ishin shumë të buta ndaj migracionit të paligjshëm.

 

Anëtarët e rinj mund të pranohen vetëm nëse të gjitha vendet anëtare bien dakord. Bullgaria është një kufi i jashtëm për Bashkimin Evropian.

 

Emigrantët përpiqen të kalojnë kufirin në mënyrë të parregullt për të mos u regjistruar në një pikë kufitare zyrtare në Bullgari.

 

Nëse janë të suksesshëm, ata zakonisht udhëtojnë për në Evropën Qendrore dhe Perëndimore.