LSDM: DPMNE ka dhënë koncesion për minierën “Ilovica”

“Vendimi për minierën “Ilovica” është marrë më 16 qershor 2012, i nënshkruar nga bashkëpunëtori i Mickoskit, Zoran Stavrevski dhe i publikuar në “Gazetën Zyrtare” në të njëjtin muaj të vitit 2012. Në të njëjtin vit, komunat e Bosilovës dhe Novo Sellës, të cilat asokohe menaxhoheshin nga kryetarët e komunave nga DPMNE, morën vendim për hapjen e minierës.”, thonë nga LSDM-ja.

 

 

Në anën tjetër, VMRO-DPMNE reagon se LSDM-ja dhe BDI-ja e kanë planifikuar prej kohësh hapjen e minierës “Ilovica”. Sipas të gjitha veprimeve të ndërmarra nga Qeveria, në vend të kompanive të njohura botërore për nxjerrjen dhe tregtimin e metaleve, “Ilovica” duhet të menaxhohet nga kompanitë e familjes Destani, e cila është e afërt me BDI-në, thonë  nga partia opozitare.

 

“Pas marrjes së aksionit dhe pëlqimit të marrë nga Qeveria, kompania e Destanit ishte e detyruar me ligj që t'i paguante shtetit një dëmshpërblim në masën 7% të vlerës së koncesionit. Cila kompani paguan për të hyrë në një projekt që e di paraprakisht se do të dështojë? Një logjikë e shëndoshë thotë se një kompani e tillë nuk ekziston. Prandaj lind pyetja a ka pasur paraprakisht marrëveshje? Sidomos duke pasur parasysh se qeveria nuk mund ta lejonte Destanin të hynte në “Ilovica”.”, - deklaroi zëdhënësja dhe anëtarja e VMRO-DPMNE-së, Marija Miteva. 

 

Sipas njoftimeve të mëparshme të ministrave, pika e rendit të ditës në seancën e qeverisë duhet të jetë “Ilovica”. Ministria e Ekonomisë bëri të ditur se ministri Kreshnik Bekteshi, nesër do të mbajë një konferencë për media ku do t'u përgjigjet të gjitha pyetjeve lidhur me koncesionin në "Ilovica".