Temperaturat ekstreme, OBSH jep alarmin: Sistemet shëndetësore në tension! Evropa kontinenti më i goditur

Nxehtësia ekstreme po rrit tensionet në sistemet e kujdesit shëndetësor, duke goditur më së shumti ata që janë më pak të aftë për ta përballuar.

 

Organizata Botërore e Shëndetësisë raportoi se nxehtësia po ndikon në përkeqësimin e shëndetit, kryesisht të personave me sëmundje, përfshirë fëmijët dhe të pastrehët.

 

“Nxehtësia ekstreme shkakton dëmin më të madh për ata që janë më pak të aftë për të menaxhuar pasojat e saj, siç janë të moshuarit, foshnjat dhe fëmijët,  të varfrit dhe të pastrehët. Kjo gjithashtu ushtron presion në rritje në sistemet shëndetësore”, tha Tedros Adhanom Ghebreyesus-Drejtor i Përgjithshëm i OBSH-së.

 

 

Evropa mbetet kontinenti më i goditur nga valët e temperaturave tejet të larta, i cili tashmë është nën alarmin e kuq.

 

Qendra e koordinimit të reagimit ndaj emergjencave të BE-së lëshoi alarme të kuqe për temperatura të larta për pjesën më të madhe të Italisë, Spanjën verilindore, Kroacinë, Serbinë, Bosnjën dhe Hercegovinën jugore dhe Malin e Zi.

 

Një pjesë e vendeve kanë ndaluar hyrjen në rezervatet natyrore dhe pyjet për të zvogëluar rrezikun e zjarreve, ndërsa bashkitë kanë hapur zona me ajër të kondicionuar në ndërtesat publike për njerëzit që të strehohen nga nxehtësia./Top Channel