Ukrainë, shpërthim në minierën “Zasyatko”, 32 të vdekur

40 minatorë ende janë brenda në miniere, por nuk dihet asgjë për gjendjen e tyre. Autoritetet konfirmojnë vdekjen e më shumë se 30 minatorëve.

 

Punonjësit e shpëtimit nuk kanë mundur të mbërrijnë në vendin ku ndodhi shpërthimi, sepse fillimisht po largojnë gazin helmues, e më pas do të zbresin nëntokë.

 

Përgjatë gjithë dimrit, Donjecku ka qenë teatër luftimesh të ashpra mes separatistëve dhe trupave qeveritare.

 

Megjithatë, në zonën ku ndodhet miniera, këto ditët e fundit nuk ka pasur asnjë përplasje të armatosur dhe për shpërthimin e sotëm duket se “fajtor” është rrjedhja e gazit. “Zasyadko” në lindje të Ukrainës është skenë e katastrofës më të madhe minerare të vendit 8 vjet më parë.

 

Që nga fillimi i konfliktit në muajin prill, ekonomia e Ukrainës është rrudhur ndjeshëm, megjithatë pavarësisht trazirave, në rajonet lindore të vendit shumë miniera funksionojnë normalisht.

 

Aksidentet sidoqoftë kanë qenë diçka e zakontë edhe përpara shpërthimit të dhunës, sepse standardet e sigurisë ishin përgjithësisht tepër të ulëta.

 

Edhe pse “Zasyadko” vetë është një prej minierave më të reja të rajonit e me pajisjet më të mira, nëntorin e vitit 2007 atje u shënua fatkeqësia më e madhe minerare në të gjithë historinë e vendit, me të paktën 101 të vdekur.