Johanesburg, nga zjarri regjistrohen mbi 70 viktima

 

"Tani për tani jemi duke u fokusuar në kryerjen e një kërkimi dhe rikuperimi në të gjitha katet. Aktualisht i kemi 73 të vdekur dhe 52 të lënduar, të cilët janë dërguar në qendra të ndryshme spitalore. Në mesin e viktimave është edhe një fëmijë. Po shkojmë nga kati në kat për t’i tërhequr trupat. Kjo është një ditë e trishtueshme për qytetin e Johanesburgut. Unë kurrë nuk kam parë diçka të tillë gjatë 20 vjetëve sa jam në shërbim.”, - deklaroi zëdhënësi i Shërbimeve të Menaxhimit Emergjent të Johanesburgut, Robert Mulaudzi.

 

Banorët mes frikës dhe ankthit kërkojnë familjarët e tyre, të tjerët rrëfejnë si arritën të ikin përmes flakëve.

 

"Çfarë di unë, familja ime ishte ende brenda. Dy vëllezërit e mi dhe motra. Kur erdha këtu, u përpoqa me të gjitha mundësitë për t'i gjetur ata, por nuk gjeta kurrë një prej tyre.”, - tha banori, David Alabi.

 

"Diçka  shpërtheu në banesën ku qëndrojmë në katin përdhesë. Mendoj se ishte gaz. Ne arritëm të dilnim nga dyert e pasme.”, - tha një banor tjetër.

 

“Ishte shumë e vështirë për ne të dilnim, të tjerët kishin bllokuar korridoret me shtretër, por unë arrita të dal me fëmijët e mi, një 13 vjeç e një dy vjeç. Arritëm të dilnim, por thithëm mjaft tym, por të paktën ia dolëm të dilnim. Ajo që është shumë e trishtueshme është se të tjerët vdiqën brenda.", - u shpreh banorja, Nobuhle Zëane.

 

"Disa nga djemtë që gjeta këtu, ata dolën nga dritaret, gratë dhe fëmijët mbetën pas dhe ata vdiqën derisa ishin brenda.”, - u shpreh banorja, Irene Ntamba.

 

Ende nuk është e qartë se çfarë e ka shkaktuar zjarrin, ndërkohë që ndërtesa është evokuar plotësisht tashmë. Ndërtesa ishte “një vendbanim joformal”, ku njerëzit e pastrehë ishin zhvendosur në kërkim të akomodimit pa ndonjë marrëveshje kontrate formale. Sipas dëshmitarëve, në ndërtesë besohet se kanë qenë duke jetuar rreth 200 njerëz.