Tiranë, ekspozitë mbi veprimtarinë e Shën Terezës

Për të nderuar shenjtoren, edhe si një figurë përbashkuese të kombit shqiptar, presidenti Bajram Begaj, priti homologen Vjosa Osmani. Krahas tyre, pjesë e vizitës ishte edhe drejtori i Institutit të Trashëgimisë Kulturore dhe Shpirtërore të Shqiptarëve në Maqedoninë e Veriut, Skender Asani, si dhe drejtuesi i Arkivit të Kosovës, Ajet Leci. 

 

Prania e arqipeshkvit Arjan Dodaj dhe e përfaqësuesve të misionit të Nënë Terezës në Shqipëri, rikujtoi sërish misionin e bamirëses së përbotshme, kudo ku pati më shumë nevojë.

 

Në dorëshkrimet që ekspozohen, kryesisht janë letra të nisura përgjatë viteve ’80, ku dëshmohet atdhedashuria e saj. Njëherazi pasqyrohet edhe vizita e saj e parë në ’89-ën në vend, e më tej nderimet që i janë bërë prej Qeverisë sonë ndër vite.