Pensionistët vazhdojnë protestat, në MPPS, takimi i grupit të punës për pensionet

 

“Grupi i punës ka për detyrë ta shqyrtojë situatën me pensionet dhe standardin e pensionistëve. Është shumë e rëndësishme që gjatë propozimit të masave dhe zgjidhjeve ligjore për sigurimin pensional apo ndryshimet e tij, të merret parasysh stabiliteti i sistemit të pensioneve dhe që pensionet të vazhdojnë të paguhen në kohë dhe në mënyrë të rregullt.”, - deklaroi ministrja për Punë dhe Politikë Sociale, Jovanka Trençevska.

 

Pas takimit, nënkryetari i Shoqatës së Pensionistëve tha se është diskutuar për një zgjidhje të drejtë dhe të qëndrueshme, e cila nuk do të shkaktojë probleme në financimin e Fondit PIOM.

 

“Në një atmosferë mirëkuptues për problemet që i hasin pensionistët dhe përmes përpjekjes  premtuese  të të  gjithë anëtarëve të këtij grupi punues, do të gjendet një zgjidhje e drejtë dhe e qëndrueshme, e cila do t’u ndihmojë të gjithë pensionistëve që gjenden në kufirin e rrezikut social.”, - theksoi nënkryetari i Shoqatës së Pensionistëve, Mile Nedelkovksi. 

 

Nga ana tjetër, pensionistët vazhdojnë protestat. Kërkojnë që pensioni minimal të jetë i njëjtë me pagën minimale dhe rritje lineare të pensioneve për 3,500 denarë.

 

“Kam përvojë pune, gjithçka kam, por marr 14,500 denarë pension për 40 vite punë.” – u shpreh një pensionist.

 

“Kërkojmë 3,500 denarë rritje lineare të pensioneve. Nga kjo kërkesë nuk do të heqim dorë.”, - tha një pensioniste.

 

Sipas deklaratave të MPPS-së, grupi punues i krijuar nga Qeveria, do të punojë për amendamente apo zgjidhje të re ligjore për sigurimin pensional dhe invalidor, për pensionin minimal dhe masat sociale për pensionistët me pension të ulët.