Ndryshimet kushtetuese, Kovaçevski: Do të sigurojmë 118 deputetë

Seanca parlamentare për ndryshimet kushtetuese do të vazhdojë kur të krijohen kushtet për të. Ky është një proces që nuk ndalet dhe prej tij varet e ardhmja e vendit, tha kryeministri, Dimitar Kovaçevski.

Edhe pse për momentin çështja e ndryshimeve kushtetuese nuk po lëvizë nga vendi, kryeministri është optimist se në fund ndërhyrja në preambulën e Kushtetutës do të bëhet me mbështetjen e 118 deputetëve.

“Seanca për ndryshimet kushtetuese do të vazhdojë kur të krijohen kushtet për të, pra kur të dihet se shumica më e madhe e deputetëve në Kuvend tashmë e kanë kuptuar se duhet miratuar. Deri në fund të këtij mandati parlamentar kemi gati edhe një vit. Unë them se në fund do të jenë 118.”, - deklaroi kryeministri, Dimitar Kovaçevski.

Mickoski: Kërkesa e Kovaçevskit, mision i pamundur

Por, lideri i VMRO-DPMNE-së, Mickoski, qëndrimin e kryeministrit se për ndryshimet kushtetuese do të votojnë 118 deputet, e vlerëson si një mision të pamundshëm. Ai thotë se një kohë të gjatë nuk u kushton rëndësi deklaratave të Kovaçevskit.

“Qëllimi i parë është ruajtja e kohezionit brenda partisë, e cila sipas informacioneve jozyrtare është e ndarë në disa struktura dhe struktura e LSDM-së është totalisht e demotivuar. Dhe nëse ai nuk u jep atyre pak shpresë, atëherë mendoj se dështimi që do të ndodhë në zgjedhjet e ardhshme parlamentare do të jetë edhe më i madh. Qëllimi i dytë është një mesazh për ndërkombëtarët, na jepni edhe pak muaj të vjedhim e të gënjejmë, sigurisht që zgjedhjet e rregullta parlamentare janë në pranverë.”, - theksoi lideri i VMRO-DPMNE-së, Hristian Mickoski.

Mickoski ripërsërit se deri sa nuk shohin vullnetin të mirë nga pala bullgare se ata me të vërtetë dëshirojnë të jenë fqinjë të mirë, VMRO-DPMNE-ja nuk do të votojë ndryshimet kushtetuese. (Sanije Duraku, TVM2)