Ulja e çmimeve, Zendeli: E dëmshme për bizneset

 

“Duhet të krijojnë politika dhe mekanizma që të marrin masa, të shtohet oferta dhe jo të vendosin vendime arbitrare. Kur i thuhet dikujt se ti nga sot do të shesësh me çmim të para dy muajve, si do t’i thuash kur nuk e din se çfarë faktorësh kanë ndikuar në çmim të atëhershëm dhe çfarë faktorësh ndikojnë sot. Ke prodhime të cilat varet dita-ditës nga hyrja e çmimeve të lëndës së parë dhe ke prodhime të cilat varen nga lënda e parë e stazhuar me muaj si p.sh. të grurit. Si do të vish me një pako masash, si për këtë të qumështit, ashtu edhe për këta të grurit, ku dallojnë natyrat e biznesit?!”, - u shpreh afaristi, Kasam Zendeli. 

 

 

Të njëjtin mendim e ndajnë edhe nga OEMVP-ja, të cilët për TVM2 thonë se ky vendim nuk është në dobi të kompanive, stimulon ekonominë gri dhe zvogëlon kualitetin e prodhuesve.  

 

“Vendimi për uljen e çmimeve të produkteve ushqimore për së paku 10% dhe ngrirjen e çmimeve të ultë, e cila po ndërmerret disa herë radhazi ngjashëm, brenda 2 viteve është mjaft i dëmshëm për kompanitë e RMV-së. Ekonomia e tregut të lirë është vënë në pikëpyetje me ndërhyrjet e shumta nga ana e Qeverisë, kështu duke stimuluar ekonominë gri ndërkaq, synimet e vendit tonë janë eliminimi i saj, por edhe i nxitjes së konkurrencës së lirë. Gjatë uljes së çmimeve të këtyre produkteve, rrezikohet edhe cilësia e produkteve nga vet prodhuesit, të cilët do të duhet të punojnë me humbje.”, - thuhet në kumtesën e OEMVP-së. 

 

 

Ndërkohë sodialdemokratët thonë se me këto masa po mbrojnë standardin e qytetarëve.

 

“Masa të tilla, përveçse do të ndikojnë drejtpërdrejt në uljen e shpenzimeve ditore të qytetarëve për ushqim, do të ndikojnë edhe në uljen e inflacionit.”, - theksoi Daniela Nikolova nga LSDM.

 

Ndryshe autoritetet përkatëse paralajmërojnë nga java e ardhshme uljen edhe për 10% të pijeve alkoolike dhe jo alkoolike.