Standardi i qytetarëve, LSDM: Kujdesemi për mirëqenien e qytetarëve

 

“Paga më të larta dhe pensione, më shumë subvencione për bujqit, shëndetësinë  dhe arsimin sigurohen për shpërndarjen e re të buxhetit. Po sigurojmë 4,25 miliardë denarë për rritje të pagave. Për harmonizimin e pagave me rritjen e pagës minimale gjatë vitit 2023 janë parashikuar 480 milion denarë. LSDM-ja po vazhdon me përkujdesjen e vërtetë ndaj qytetarëve dhe kompanive.”, thonë nga LSDM-ja.

 

 

Por për opozitën, vendi është në varfëri të thellë. Sipas partisë së Mickoskit, përkundër përballjes me këtë fenomen të trishtë, zëvendëskryeministri, Artan Grubi, po realizon biznese të nëntokës duke firmos marrëveshje me person të dyshimtë bullgar për themelimin e tre shoqatave për lojëra online të fatit. 

 

“Përderisa Maqedonia po fundoset në varfëri dhe nga pacientët vidhen ilaçe, Artan Grubi nëpërmjet shefit të kabinetit të tij lejon tre licenca të reja për lojërat e fatit në Maqedoni. Ky është ai vendim i Qeverisë me nënshkrim të Artan Grubit ku thuhet se me këtë vendim lejohet puna e bordit drejtues të Shoqatës Aksionare për lojëra të fatit të Lotarisë Shtetërore të Maqedonisë në lidhje me marrjen e vendimit për themelimin e tri shoqatave për lojëra online të fatit.”, - deklaroi zëdhënësi i VMRO-DPMNE –së, Naum Stoillkovski. 

 

Nga VMRO–DPMNE-ja thonë se personi me të cilin janë bërë dakordimet është mafiozi bullgar, Vasill Boshkov, tanimë nën arrest shtëpiak nga autoritetet bullgare. VMRO-ja kërkon nga pushteti përgjegjësi për dilemat e ngritura dhe shkelje të ligjit.