Ngrohja qendrore në Shkup, KRRE: Ngrohje do të ketë, çmimet mund të rriten

 

 

“Sipas informacioneve të mia, tubi i ngrohtores do të vendoset përgjatë urës “Bellasica”, mirëpo edhe sikur të mos vendoset,  energji termike për ngrohje në Shkup do të ketë, mirëpo çmimi i ngrohjes do të ishte shumë më i lartë. Pra, me qëllim të mos i ngarkojmë financiarisht qytetarët shtesë për diçka që ata nuk kanë faj, KRRE-ja nuk do të merr vendim të rrisë çmimin e ngrohjes qendrore, për shkak  se nuk është vendosur ende tubi i ngrohjes.”, - deklaroi kryetari i KRRE-së, Marko Bislimovski. 

 

Çmimi përfundimtar i ngrohjes do të dihet atëherë kur rregullatorët do të shohin në terren se po vendoset tubi i ri i ngrohjes përgjatë kësaj ure, deri atëherë, KRRE-ja nuk do të miratojë vendimin  për çmimet, qytetarët të jenë të qetë, thotë  Bislimovski.

 

“Kur do të vendoset tubacioni i riparuar i ngrohjes qendrore përgjatë urës “Bellasica”, ne atëherë do ta vazhdojmë procedurën për përcaktimin e çmimit të ngrohjes qendrore me të vetmin qëllim, që t’i mbrojmë qytetarët nga rritje që nuk u takojnë.”, - u shpreh kryetari i KRRE-së, Marko Bislimovski. 

 

Nga KRRE-ja thonë se energjia termike e siguruar nga TETO është tre herë më e lirë se sa nga operatorët tjerë, andaj rregullatorët insistojnë, që kryeqyteti t’i furnizojë pjesën më të madhe të energjisë termike për ngrohje nga TETO. Sipas të dhënave të KRRE-së rreth 60 mijë amvisëri janë shfrytëzues të ngrohjes.