Von der Lejen në Shkup me mesazh: Eurointegrimi është zgjedhja dhe përgjegjësia e juaj

 

“Zgjedhja është e juaj dhe me të vërtetë shpresoj se të gjitha palët, të gjitha partitë do ta shfrytëzojnë këtë moment dhe do t’i përkrahin ndryshimet kushtetuese, sepse bëhet fjalë për të ardhmen tuaj,  për zgjedhjen tuaj dhe  të gjitha partitë kanë përgjegjësi për të ardhmen e Maqedonisë së Veriut. Ne duam që RMV-ja të bëhet anëtare e BE-së.”, - deklaroi kryetarja e KE-së, Ursula von der Lejen.

 

 

Edhe kryeministri Kovaçevski me shpresë se deputetët e Kuvendit do ta kapin momentin i cili shpie në familjen e madhe evropiane. Vë theksin te VMRO-DPMNE-ja si lojtare kryesore që pengon miratimin e ndryshimeve kushtetuese, duke shtuar se nuk kalkulohet dhe nuk ndërtohet rejting politik mbi interesa madhore shtetërore. 

 

“E kemi shansin e papërsëritshëm për të siguruar të ardhme evropiane për vendin me miratimin e vendimeve të nevojshme në Kuvend. Shpresoj që ata të cilët gjithmonë në histori kanë qenë kundër integrimeve euroatlantike, përfundimisht për herë të parë në politikën e tyre të ekzistimit do të tregojnë në Parlament se janë pro së ardhmes evropiane të shtetit, sepse tash ka dritare të hapur për aderim në BE.”, - theksoi kryeministri, Dimitar Kovaçevski.

 

Von der Lejen e cila turin diplomatik nga Shkupi e filloi me promovimin e planit zhvillimor të BE-së për Ballkanin Perëndimor, shpalosi pakon prej gjashtë miliardë eurosh për partnerët e Ballkanit Perëndimor, në drejtim të reformave dhe zhvillimit ekonomik. Nga vendi ynë, kryetarja e Komisionit Evropian vizitën e vazhdon në Kosovë, Mal të Zi, Serbi, për ta përmbyllur në Bosnjë dhe Hercegovinë.