Zgjedhjet, Kovaçevski: Do të respektohen afatet ligjore

 

“Opinioni do të informohet për afatin e saktë kur do të arrihet marrëveshje në kuadër të Parlamentit, pasi që Parlamenti do të duhet ta sjellë këtë vendim. Kryetari i Kuvendit i shpall zgjedhjet dhe do të duhet pasur parasysh se gjatë muajve pranverorë kemi edhe festa fetare që bashkëqytetarët tanë i shënojnë. Andaj duke pasur parasysh të gjitha këto parashikime, do të dakordohet datë dhe normalisht në kuadër të kornizave ligjore, ku në ligjin tonë qëndron obligimi për qeveri teknike. Kjo do të formohet 100 ditë para mbajtjes së zgjedhjeve parlamentare, njëjtë sikurse ka qenë deri më tani.”, - deklaroi kryeministri, Dimitar Kovaçevski. 

 

Sa i takon daljes së LSDM-së në zgjedhje bashkë me BDI-në, sikurse në ato presidenciale me një kandidat të përbashkët, por edhe në parlamentaret me koalicionime, kryeministri u shpreh se kjo do të dihet pasi të vendosin organet e partisë dhe do t’i bëhet publike qytetarëve. Ndërkohë nga VMRO-DPMNE-ja këmbëngulin që zgjedhjet parlamentare të mbahen bashkë me raundin e dytë të presidencialeve.  Pro zgjedhjeve të përbashkëta është edhe opozita shqiptare.