Avramovska-Madiq: Këshilli Gjyqësor ka legjitimitet dhe integritet veprimi

 

“Të gjitha organet e zgjedhura nga Kuvendi, pra edhe ky Këshill Gjyqësor që ka përfaqësuese nga radhët e gjykatësve, që vetë i ka zgjedhur, normal që ka legjitimitet dhe integritet dhe mund të veprojë. Ne shohim që në muajt e kaluar Këshilli Gjyqësor është duke vepruar, duke marrë vendime unanimisht, proceset po lëvizin. Ndërsa sa i përket Gjykatës Supreme nuk do të komentoj, sepse disa herë kam thënë se qëndrime dhe vendime të gjykatave nuk do të komentoj, sepse është ndërhyrje e pushtetit ekzekutiv në pushtetin gjyqësor.”, - theksoi zëvendësministrja e Drejtësisë, Viktorija Avramovska – Madiq.

 

Ditë më parë, kryetarja e Gjykatës Supreme, Besa Ademi, nuk u paraqit në takimin e punës që Këshilli Gjyqësor kishte caktuar për të diskutuar mbi presionet politike, që Ademi i denoncoi publikisht në një intervistë. Ajo kundërpërgjigjen e kishte me shkrim dhe mes tjerash potencoi se është mirë që ky debat të bëhet pasi të publikohen raportet ndërkombëtare. Ademi njëherit i bëri thirrje Këshillit, që si për fillim të flasë për presionet e dy ish-kryetareve, Vesna Dameva dhe Pavlina Cërvenkovska.