Izraeli vazhdon ofensivën ajrore mbi Gaza, bombardohen spitalet dhe kampet e refugjatëve

 

"Unë kam dy fëmijët dhe gruan time. Kam gati gjithë familjen, nënën time, babain, njërën motër dhe një tjetër motër me dy fëmijë. Në fund i vranë, ata ranë dëshmorë.", - u shpreh një banor i Gazës.

 

Shënjestër e sulmeve izraelite këtë mëngjes ishin edhe spitalet. Një shpërthim i madh u raportua pranë spitalit “Al-Shifa” në qytetin e Gazës, ndërsa në Khan Jonis u bombardua departamenti i radiologjisë në spitalin “Naser”.

 

“Shikoni si është shkatërruar spitali, këtu nuk mund të trajtohen më pacientët.”, - thanë nga stafi mjekësor në spitalin “Naser”.

 

"Aq shumë nga sistemi shëndetësor është shembur në Gaza. Gjashtëdhjetë e gjashtë për qind, dy të tretat e klinikave të kujdesit shëndetësor parësor janë mbyllur. Ato nuk janë funksionale.", - theksoi drejtori i Emergjencave Shëndetësore të OBSh-së, dr. Majkëll Rajan.

 

Shumë pacientë dërgohen nëpër spitalet e Egjiptit për t’u trajtuar, duke kaluar përmes pikës kufitare Rafah, por as ky vendkalim nuk është i sigurt.

 

"Ka më shumë se 50 pacientë që kanë nevojë për trajtim në listën tonë. Ambulancat tona që transportonin fëmijë dhe gra të plagosur ishin gati në vendkalim, por ne u befasuam kur dëgjuam se ata ishin në shënjestër të sulmeve.”, - deklaroi ministri i Shëndetësisë i Egjiptit,  Khalid Abdel-Gafar.

 

 

Me iniciativën e presidentit francez, Emanuel Makron, u mbajt mbledhje urgjente për të diskutuar situatën në Gaza. Shumë krerë shtetesh dhe qeverish morën pjesë në takim, në mesin e tyre edhe presidenti palestinez, Muhamed Abaz. Thirrjet për mbrojtjen e  civilëve dhe armëpushim vazhdojnë.

 

"Lufta kundër terrorizmit nuk mund të bëhet kurrë pa rregulla, Izraeli e di këtë. Civilët duhet të mbrohen. Kjo është absolutisht e domosdoshme, është e panegociueshme. Situata është shumë e rëndë dhe po degradon dita-ditës. Tani duhet të punojmë për të siguruar mbrojtjen e civilëve. Për këtë, ne kemi nevojë shumë shpejt për një pauzë humanitare dhe duhet të punojmë drejt ndërmjetësimit të një armëpushimi.”, - theksoi presidenti i Francës, Emanuel Makron.

 

 

Sipas presidentit të Turqisë, vendet perëndimore kanë qëndrime hipokrite dhe janë shumë të dobëta për të bërë thirrje për armëpushim, si dhe për të kritikuar vrasjet e fëmijëve. 

 

"Ne po përballemi me një fanatizëm që legjitimon masakrën e fëmijëve. Vendet perëndimore, të cilat vazhdimisht flasin për të drejtat e njeriut, liritë dhe demokracinë, po i shikojnë masakrat e Izraelit nga larg. Këto vende dhe organizata janë shumë të dobëta për të bërë thirrje për armëpushim, madje edhe për të kritikuar vrasësit e fëmijëve.”, - u shpreh presidenti i Turqisë, Rexhep Taip Erdogan.

 

Që nga shpërthimi i konfliktit janë vrarë mbi 10,600 palestinezë, 70% e tyre janë gra, fëmijë dhe pleq. Ndërsa nga pala izraelite jetën e kanë humbur mbi 1,500 persona.