Nebiu: Në ankand publik, katër prona të Mijallkovit

 

“Nga ky ankand publik, nëse gjithçka përfundon me sukses, në arkën e shtetit do të kthehen nga patundshmëritë të konfiskuara nga ish-drejtori i DSK-së afër 330,350 euro. Kjo nuk do të thotë se ne me këtë ankand publik do ta përfundojmë, sepse nga pasuria e konfiskuar të cilat janë ende pa u shpallur në ankand publik ka diku 20 apartamente dhe 8 hapësira që nënkuptojnë garazhe në rrugën “Sllavejko Arsov”.”, - deklaroi drejtori i Agjencisë për menaxhimin e pronës së konfiskuar, Driton Nebiu.

 

 

Nëse shiten të gjitha pronat e konfiskuara nga Mijallkovi, në arkën e shtetit pritet të kthehen diku 15 milion euro, thotë Nebiu, i cili njëherit bën të ditur se tanimë janë shitur dy banesa dhe një parcelë dhe në arkën e shtetit janë kthyer rreth 250 mijë euro. Nebiu njëherit bën të ditur se me ardhjen e tij në krye të kësaj Agjencie ka ndarë mbi 100 vetura për disa institucione shtetërore.

 

“Duke pasur parasysh për krizën ekonomike shtetërore dhe globale e pamë të arsyeshme të gjitha veturat që i kemi nëpër depot e Agjencisë për menaxhimin e pronës së konfiskuar, që kanë lëndë të përfunduar nga ana e gjykatës dhe që kanë lëndë të përfunduar, ne u zotuam t’ua shpërndajmë të gjitha institucioneve shtetërore.”, - theksoi drejtori i Agjencisë për menaxhimin e pronës së konfiskuar, Driton Nebiu.

 

Nga Agjencia deri tani janë ndarë edhe 6 mijë pako për nxënësit e disa shkollave të vendit, ndërsa në përgatitje e sipër janë edhe 14 mijë pako, të cilat do të shpërndahen nëpër shkolla në nivel republikan.