Lidhja Evropiane për Ndryshim, tre partitë formojnë grupin parlamentar

 

“I bëjmë thirrje edhe njëherë kryetarit të Kuvendit, zotit Talat Xhaferi, të mos zvarrisë zgjedhjen e anëtarit të KShZ-së, që i takon opozitës, sepse kjo e bën bashkëfajtor për mosrespektimin e kodit zgjedhor. Ne jemi të vendosur që ta bëjmë këtë betejë deri në çlirimin e plotë të shqiptarëve nga regjimi i BDI-së dhe i çirakëve të tyre.”, - deklaroi kryetari i Alternativës, Afrim Gashi. 

 

Jashtë frontit mbetet deputeti Hysni Ismaili, i cili formoi fraksion nga Alternativa, parti kjo e cila s’do ta kundërshtojnë ushtrimin e detyrës së tij si nënkryetar parlamenti.

 

“Nuk e kemi problemin te posti, e kemi problemin te zgjedhjet e ardhshme, te fitorja dhe dëgjimi i zërit të popullit, te bashkimi i opozitës, te ftesa që të na bashkohen sa më shumë njerëz, individë, parti e kështu me radhë, postet le t’i mbajnë dhe le t’i gëzojnë edhe pesë, gjashtë muaj, pastaj vjen populli edhe e bën ndryshimin.”, - theksoi kryetari i Alternativës, Afrim Gashi.

 

Fronti opozitar fton edhe deputetë të tjerë, përfshirë edhe ASh-në që t’u bashkëngjitet, pasi konsiderojnë se ka vend të mjaftueshëm në opozitë për të vepruar kundër pushtetit LSDM – BDI.

 

“Elektorati i ASh-së është opozitar dhe është ngritur me narrativen antiqeveri dhe mendoj se elektorati do të dijë të dëgjojë strukturat e tyre, përndryshe do të shkojnë si subjekt, për shkak se preteksti i fundit është se kanë hyrë në Qeveri për t’i bërë ndryshimet kushtetuese dhe nuk po ndodhin ndryshimet kushtetuese, por në resorin e tij ndodh ndryshimi i Kodit Penal.”, - theksoi kryetari i Lëvizjes Demokratike, Izet Mexhiti. 

 

Opozita shqiptare shprehet e hapur të kyçet në grupet e punës që pritet të formohen sa i takon caktimit të datës së zgjedhjeve, edhe pse sot në koordinim tek kryeparlamentari Talat Xhaferi, nuk është shtjelluar detajisht kjo temë, me arsyetimin se u mbetet partive të koordinohen, duke pasur parasysh edhe afatet e rregullta të cikleve zgjedhore.